لأوّل مرّة.. شاهيناز تكشف أسباب ابتعادها عن الغناء

متابعة بتجــرد: في خلال حوارها ضمن برنامج “المنسي” الذي تقدّمه الإعلامية إنجي هشام عبر شاشة قناة “هي”، تحدثت المطربة شاهيناز عن فترة غيابها عن الساحة الفنية الفترة الماضية، مؤكدةً أن الحجاب لم يكن السبب في ذلك.

وقالت شاهيناز: “كل حاجة في الدنيا قدر وأنا خدت قرار الابتعاد عن الفن بمحض إرادتي ومحدّش غصبني، وبعدت وقت ولادة ابني وقررت اتفرغ له تماماً، وأنا بشوف إن الطفل ده مسؤولية كبيرة وحسيت أن هو أولى بوقتي واهتمامي، وأنا في الفترة دي نفسياً كنت حاسة إني عايزة أبعد عن كل حاجة، وأفضل جنب ابني أكتر حد بحبه في الدنيا”.

وأضافت: “فترة غيابي عن الفن خلّتني اتجه للحجاب، ولكن الحجاب مبعّدنيش عن الفن، وبعد ما اتحجبت بسنتين أو ثلاثة غنيت، عملت أغاني اجتماعية ودينية وأنشودة مديح في الرسول، وعملت أغنية اسمها “شكراً أوي، وكنت مرتدية الحجاب، والحجاب مكنش عائق في إني أغني”.

وتابعت: “أي ست في الدنيا لما بتاخد خطوة الحجاب بتبقى مبسوطة، ومين عارف أنا ممكن ألبس الحجاب تاني، أنا مبرفضهوش ولكن في الفترة الحالية أنا موش قادرة إني أفضل مرتدية الحجاب، وشيلت الحجاب من حوالي 10 سنين، وعملت ألبومات وأغاني سينغل تاني”.

وأردفت بالقول: “أنا فعلاً اختفيت شوية، ولكن أنا من 2017 لغاية دلوقتي عملت رصيد فني في ناس مختفوش وملبسوش الحجاب معملهوش، أنا عملت ألبومين و6 فيديو كليب، و12 أغنية سينغل، مفيش حد من بنات جيلي عمل ده تقريباً”.

واستكملت شاهيناز حديثها موضحةً: “الوسط الفني بيتقبل الممثلة المحجبة عن المغنية شوية، لأن في بعض الموروثات الفكرية في مجتمعاتنا العربية مبتقبلش ست تكون بحجاب وتغني، يمكن في آخر أربع سنين شوفنا نداء شرارة وهلا رشدي، وفي وقتي الناس مكنتش متقبلة ده أوي”.

وعن رأيها في تحريم بعض الفنانين المعتزلين للفن، علّقت شاهيناز قائلةً: “مقدرش أحكم على بني آدم هو شايف الدنيا من منظور إيه، هو شايف حاجة ممكن أنا مكونش شايفاها، وكل واحد بيختار الأنسب لحياته، وربنا خلقنا عندنا إرادة وعقل والبني آدم خطّاء ممكن آخذ قرار وأرجع بكره أندم عليه”.